l    dall'occurrenza ...

... e la prevista en La Quotidiana dils 1 d'avrel 2025:

Gievgia, ils 3 d'avrel 2025 ...

... eran nus en 16 per raquintar in a l'auter da deletgs culinarics e da tratgas deliziusas. Igl ei semussau dapi igl onn 2016, dapi che nus realisein las seras "da cuminonza", che quellas da Mi Sa Pa (Mintgin Sa Participar) ein quasi "seras da famiglia". Ei regia in ambient luc e legher, spontan e cordial. E quella ga han quasi tut ils presents priu il plaid e raquintau: da tscheinas semplas ni opulentas, da tratgas exoticas ni indigenas.

Ils bizochels gronds cun uettas, las omlettas cun spinat, il ris en latg cun buglia da meila e las coccas da pulenta ein vegnidas menziunadas. Igl ei vegniu raquintau da suppas cun carn siarp egl Orient Extrem e da randas che vegnan duvradas leu darar en cuschina, mo savens per bellezia decoraziun sin fieras da fretgs e legums. Nus vein udiu che dir muntaniala seigi aunc bia pli delizius e delicat che dir tscharva e co ch'ei seigi da cuschinar quella "lebra". Nus vein udiu dil luxus culinaric si d'alp avon varga 50 onns: ina scatla da conservas giganta cun en 3 kg tuargia. Nus vein udiu che metter si zucher empau dapertut era in gudiment d'affon - perfin sin ils spaghetti cun tomata. E nus vein udiu che la tuorta da cuol (Biestmilchtorte) era definitivamein buc la tratga desiderada sch'ins veva gronda fom. Igl ei semussau sin las fatschas attentas che quei che gusta ad in grondius e vegn taxau sco delizius ei per in auter in motiv da gir: na engraziel.

Risadas ha ei dau biaras. E quella gada ha ei dau alla fin - tier aua e vin - dus musters culinarics. Andreas Joos veva fatg paté de foie (ch'era stau in tema a "da cuminonza" ils 3.3.2025) ed ina scatla bein plein da ses amaretti.
                                                                                                                             Maria Cadruvi