Gievgia, ils 3 d'october 2024 ...
... ein biebein 50 persunas stadas "da cuminonza" en la stanza da scola 11. Il tema "salvament, tgira ed agid medicinal" sa daventar actuals tier mintgin. Mo secapescha che las biaras persunas ein ledas sch'ellas ston buca ir el spital u far diever dil clom d'agid 144. Sch'ellas san denton, ch'ellas fussen el seracass en buns mauns, sche sa quei patratg gia esser in confiert.
Bianca Bleuler (28 onns, specialista da tgira) ei vegnida a "da cuminonza" en sia vestgadira da lavur: in t-shirt blau e caultschas alvas. Ed ei ha fatg surstar cons utensils pratics ch'ein p.ex. mo gia el sac da sias caultschas, sin l'altezia dalla queissa dretga: sper ina forsch e zatgei da scriver era ina sdrema pupi cun si emojis, naven dil smiley tochen tier la fatscha cun tschera brutta. Quei seigi in agid, per che pazientas ni pazients sappien exprimer l'intensitad da lur dolurs, era sch'els sappien buca discuorer ni "mo" en in lungatg jester. Era zacons cudischs gross ord il temps da sia scolaziun sco specialista da tgira veva ella priu cun ella. Oz drovi ella strusch quels - ei seigi d'anflar quasi tut quei era egl internet.
Roger Cadruvi (44 onns, sanitari da salvament) ha raquintau dad in cass da salvament che seigi capitaus dacuort. In um en in negozi grond eri cupitgaus e savevi buca star pli sin atgnas combas. Mo avon che seschar transportar dil 144 hagi el giu aunc da tuttas sorts giavischs: ch'ei vegni pachetau e pagau sias cumpras e ch'el drovi aunc gasettas e cigarettas ... Cass da bagatella detti ei adina puspei en sia lavur. El veva priu cun el a "da cuminonza" il sacados da salvament ed el ha priu dapart il cuntegn e presentau quel en detagl al publicum: p.ex. ina sort etui cun en massa medicaments en pigns pigns guoters, utensils per sustener la respiraziun, plasters e faschas per blessuras.
Ton Bianca sco Roger ein carschi si a Ruschein. Ed omisdus ein arrivai a lur lavur actuala pér en in secund pass professiunal. Bianca, ch'ha fatg gl'emprem in emprendissadi mercantil, ha raquintau ch'ella schevi aunc en scola secundara: "Tgirunza? Jeu? Mai e pli mai?" Mo tuttenina seigi igl interess ed il plascher per quella professiun staus cheu. Roger, ch'ha fatg igl emprendissadi da mecanist da maschinas agricolas ed ei era ius siat onns cun camiun, ha manegiau che el seigi quasi "ruschnaus" viaden en la professiun da sanitari da salvament. In collega che mavi cun l'ambulanza hagi svegliau siu interess ed el hagi ponderau avon 16 onns: "Pertgei buc far aunc ina scolaziun supplementara?"
Ils dus hosps dalla sera han en mintga cass capiu da svegliar igl interess dil publicum e da schar sentir il plascher e la cuntentientscha ch'els cattan en lur lavur. Lur cumpetenzas e lur savida han perschuadiu. Sin la damonda tgei che seigi tenor els il pazient ni la pazienta ideala han els manegiau: "Carstgauns che expriman enviers nus lur renconuschientscha per quei che nus prestein." Mo - circa la mesadad dallas persunas ch'els salvien ni tgirien enconuschien buc il plaid "engraziel".
Maria Cadruvi
