Vendergis, ils 3 da matg 2024 ...
... han varga la mesadad dallas 21 persunas presentas raquintau spontanamein digl emprem auto. Ei ha dau bia da rir, da surstar, da seregurdar. "Sas aunc dalla Lisa?" La Lisa era in Renault 8 che veva custau 180 francs avon 50 onns. Ella era vegnida embellida dils dus novs possessurs cun duas marcantas sdremas melnas dalla vart. Ina automobilista ha raquintau che siu emprem auto hagi fatg bia plascher all'entira famiglia. Cun 19 onns vevi ella fatg igl examen dad ir cun auto, mo daners per cumprar in - vevi ella buc, avon 40 onns. Siu bab, che veva buc auto, hagi manegiau: "Oh, sche ti has uss fatg igl examen, stos ti è ir cun auto e schiglioc emblidas quei che Ti has empriu. Jeu paghel el." Il vendider hagi mess a cor ad ella da gie cumprar in cun quater portas. Ella dueigi patertgar vida ses geniturs che sesien forsa davos ed hagien aschia bia pli lev dad ir en ed o. 7000 francs hagi igl auto custau e vevi ina colur oranscha che hagi mai plaschiu ad ella. Mo ella hagi saviu constatar biaras gadas ch'il vendider hagi giu tutta raschun cun sia recumandaziun dallas quater portas.
Divertenta ei è stada la historia dalla pli cuorta veta d'in agen auto, ni da quei vehichel che vess duiu daventar igl emprem agen auto. In collega hagi recumandau: "Va gl'emprem in tochet cugl auto e cumpra e paga el pér suenter." Igl auto vess custau 400 francs, mo quei vegl Ford hagi dau si il spért suenter paucs kilometers, aschia che la caussa seigi stada liquidada avon ch'entscheiver. In auter automobilist ha raquintau che el hagi saviu cumprar siu emprem auto mo grazia agl emprest dad ina onda. Ed aunc in auter ha tradiu ch'ei seigien i avon da quei da 45 onns si Prau Grass cun in VW ch'in aug dad el vevi procurau. Sin ina via che seigi carrabla cun in benagl sappien ins franc era ir cun in Käfer, seigi stau lur idea. Cu ei seigien turnai giu el vitg sche vesevi igl auto o intec auter ch'avon. Igl ei è vegniu raquintau a "da cuminonza" dad immensas installaziuns da pli baul per tedlar musica egl auto. Ed è da gronds autos americans ei stau la tschontscha, autos che in um - oz pensiunau - ha carrau sco student els Stadis Uni dall'America, autos che buevien sco vaccas. Mo cunquei che il prezi dil benzin eri da gliez temps, leuvi sur mar, aschi bass, eri quei buc veramein in problem.
La moderatura dalla sera ha tut emblidau da mirar denteren sin l'ura. Il temps ei vargaus sco da sgular cun tut las historias - è da quellas da montar cadeinas ni da far spontanamein cugl auto in viadi a Paris. Cuort avon las 10 la sera ha ei lu aunc dau in sitg - aua ni vin - per star aunc in'uriala da cumpignia. Ina sera - sco las biaras da MiSaPa (Mintgin Sa Participar) en in ravugl pli pign che schiglioc - mo en in ambient fetg luc, divertent e famigliar.
